龙周刊 THE DRAGON WEEKLY

民族源远流长 繁衍千秋万代

佔中判決指指點點 肥彭莫非幕後黑手?(粤语版)

「齊歡唱,同慶賀……」「佔中九男女」尋日全部被判罪成,再次證明公義只會遲到而唔會缺席,市民直頭要開香檳慶祝,之但係佔中幕後黑手絕對唔止台前呢九男女,始作俑者嘅漢奸黎固然排住隊等落鑊,人稱「英國維園阿伯」嘅末代港督彭定康,明明路人甲乙丙卻係都要指指點點,依牙鬆弶,話當中冇景轟,三歲細路都唔會信喇。

姑且聽吓條友點樣廢噏。佢話喎,大部分人都認為應該團結社會嘅時候,港府卻用過時嘅普通法控罪,起訴二○一四年嘅政治事件,係「尋求報復」。有人就講得啱嘞,肥彭作為末代港督,同香港嘅關係喺廿二年前已經結束,香港早就係中國不可分裂嘅一部分,條友有咩資格說三道四吖。

不妨打個譬喻,過氣租客明明搬走超過廿年,一時彈窗簾布唔遮光,一時話張梳化移咗位影響風水,仲衰到得閒無事𥄫女主人沖涼,唔搵掘頭掃把抨佢算畀面喇。更加唔好講呢位「租霸」有破壞冇建設,搞到間屋蓉蓉爛爛,今時今日香港地亂象叢生,正正就係拜呢條肥佬暗埋地雷短樁所賜。

講真,肥彭借香港刷存在感唔係今日嘅事。咁多年嚟,香港逢親大事小事,肥彭例必加把嘴,真可謂倒瀉乜都有佢份。鬼咩,呢舊過氣舊電池政治能量歸零,喺祖家乏人問津,唯獨香港有班戀英慕殖之徒對佢推崇備至,言聽計從,老人家次次過親嚟,門生故舊如蟻附羶,眾星拱月,唔知嘅仲以為殖民主子再次君臨天下,話唔過癮就假嘅。

咁當然喇,世上沒有無緣無故嘅愛,亦沒有無緣無故嘅恨,更加沒有無緣無故嘅關心,肥彭妄議佔中判決,絕對唔止山草藥噏得就噏咁簡單。條友老早就講過,「港獨」唔可行亦冇市場,只會削弱對民主嘅支持,反而佔中「和平理性」,可以爭取最廣泛支持。畫公仔幾乎畫到出腸嘞,明玩港獨激嬲阿爺制唔過,係玩都應該玩陰嘅,透過「顏色革命」和平演變至係「有利有節」。

結果係點大家有眼見,經歷佔中一役,港獨勢力氾濫成災,由暗轉明,特別係大學校園,更加淪為播獨基地。你哋話嘞,肥彭落手落腳畫埋路線圖畀佢班徒子徒孫跟,後座司機下指導棋都不足以形容,直頭連堂軚都搶埋嚟自己揸,話佢係「幕後黑手」,絕非無的放矢。

不過嘥氣喇。三十年河東,三十年河西,今時今日西方不亮東方亮,大不列顛早就淪為三流國家,淨係一場脫歐鬧劇已經搞到一褲都係,不知伊於胡底。肥彭咁有閒情逸致指點江山,不如多啲為祖家建言好過,繼續狗拿耗子──多管閒事,盞自暴其醜衰收尾嘅咋!

题图:反佔中團體得悉裁決後開香檳慶祝。(徐家浩攝)

(港媒东方来鸿)

发表评论