远方来鸿：前港府官员上电台闹爆该台日日唱衰国家

香港电台（简称港台）多次被闹爆以公帑制作节目批评政府，立法会前议员锺树根曾经狠斥过港台“食碗底、反碗面”（吃里扒外）。前政府新闻统筹专员冯炜光日前就以时事评论员身份上港台时事评论节目，仲喺节目中多次批评港台，佢话︰“议员同传媒，包括今日制作呢个节目嘅电台，几乎每日都要唱衰自己国家先安乐。”唔知港台会否自觉今次捉虫呢﹖

冯炜光喺节目一开波就话自从回乡证变咗回乡卡后，佢就成日袋住方便随时返回内地，但香港有传媒，包括制作呢个节目嘅传媒，就极少报道国家正面故事，喺传媒影响下仲搞到佢身边一啲朋友唔肯过深圳河，唔肯去了解国家发展喎。真系一开声就先打港台五十大板。

咁都未够，冯又话国家40年来为7亿人脱贫，但自诩自由民主胜过内地嘅香港，就为100万人脱贫都未做到。佢又以深圳为例，话当地GDP都超越有民主自由嘅香港，香港真系望尘莫及，但香港嘅议员同传媒包括港台，就几乎每日唱衰国家，反问咁样点令香港同国家有客观理性嘅交流咁话。佢又提到一啲唱衰内地嘅议员一早已喺内地买楼，问到“醒目嘅香港人仲信佢哋？”冯喺人哋节目踩番人转头，真系唔知仲有冇下次喇！